Imanol Pradales lehendakariak Bilboko EDE eraikin berria bisitatu du martxoaren 10ean. Proiektu hori berrikuntza sozialerako eta bizikidetza komunitariorako gune gisa sortu da. Bisita instituzionalak gure erakundearen egoitza berriak sinbolizatzen duen konpromisoa aitortu du: proiektu sozialak, komunitarioak, gastronomikoak eta kulturalak elkarrekin bizi diren lekua.
Jon Mancisidor EDEko presidenteak espazio berriaren zentzua eta eraikinaren historiarekin duen lotura azpimarratu zituen bere hitzaldian. “Eraikin irekia da, bere historiari eta Jesusen Bihotzaren Apostolikoek 1947an sortu zuteneko espirituari leial izan nahi diona: gerraosteko urte gogor haietan behartsuentzako harrera, egoitza eta jantokia zen. Apostolikei gure esker ona adierazi nahi diegu utzi diguten legatuagatik, hainbeste urtez elkarrekin egindako ibilbidean izan duten konfiantzagatik eta eskuzabaltasunagatik“, adierazi zuen.
Jon Mancisidorrek gogoratu zuen, gainera, eraikinaren inaugurazioak EDE Fundazioaren 50. urteurrenarekin bat egingo duela. Ibilbide hori eskautismoarekin eta aisialdiko hezkuntzarekin lotutako pertsona-talde txiki batekin hasi zen. “Dozena erdi bat pertsona baino ez ziren bidean hasi zirenak komunitate- eta gizarte-eremuan, betiere pertsona eta kolektibo kalteberenen problematikak jorratzeko helburuarekin“.
Hirugarren Sektore Sozialaren erreferente bat
Bere hitzaldian, Imanol Pradales lehendakariak EDErekin izan zituen lehen loturak gogorarazi zituen, eta hirugarren sektore sozialean izan zuen zeregina nabarmendu zuen. “EDE Fundazioari buruzko nire lehen oroitzapenak nire auzoan, Mamarigan, egiten zenuten lan komunitarioarekin eta eskaut mugimenduarekin lotuta daude“, adierazi zuen.
Lehendakariak erakundeak azken hamarkadetan izan duen hazkundea azpimarratu zuen: “Duela mende erdi aisialdiaren esparruan ereindako hazi txiki hura handitu egin da baso bat bihurtu arte. Hirugarren sektore sozialaren eta ongizatearen eta integrazioaren euskal ereduaren adierazle bikaina zarete“. Era berean, eraikin berriak espazio gisa duen esanahia baloratu zuen: “Eraikin hau, batez ere, esperimentazioaren eta berrikuntza sozialaren aldeko apustua da. Elkartzeko, ikusarazteko eta elkarrekin bizitzeko gunea da, auzoarekin konektatzeko eta auzora irekitzeko“.
Topaketarako eta komunitaterako proiektua
EDE eraikin berria auzoari eta herritarrei irekitako gunea izateko asmoz sortu da. Bertan, ekimen sozialak, komunitarioak, kulturalak eta gastronomikoak garatzen dira, aukerak sortu, sareak indartu eta gizarteratzea sustatzeko helburuz.
EDEk bereziki eskertu nahi du ekitaldi honetan gurekin egon diren pertsona guztien presentzia: EDEko langileak, erakundeetako ordezkariak, Zuzendaritza Batzordeko kideak, erakunde lagunak eta gertuko kolektiboak.
