18 Nov, 2022
2022tik, EDE Fundazioa Europako Bauhaus Berriko (NEB) bazkidea da. Europako Bauhaus Berria (NEB) Europako Batzordearen proposamen estrategikoetako bat da, eta haren helburua da XX. mendeko Bauhausen inspiratutako mugimendu bat sortzea, jasangarritasuna, esperientzia ederrak eta kalitatezkoak eta inklusioa uztartuko dituena, elkarrekin irudikatzeko eta eraikitzeko oraina eta etorkizuna hobea, ederragoa, inklusiboagoa eta iraunkorragoa.
Ursula von der Leyen Europako Batzordeko presidenteak 2020an iragarritako Europako Bauhaus Berria ekimen sortzaile eta diziplinartekoa da: etorkizunean bizitzeko moduak diseinatzeko topagune bat irekitzen du eta artearen, kulturaren, gizarteratzearen, zientziaren eta teknologiaren arteko bidegurutzean kokatzen da. Era berean, Itun Berdea bizi garen lekuetara eraman nahi du, eta guztion ahalegina eskatzen du etorkizun iraunkor, inklusibo eta eder bat irudikatu eta eraikitzeko, pertsona guztien buru eta arimentzat. Ekimena Europa osoko eta munduko beste leku batzuetako milaka pertsona eta erakunderekin batera diseinatu da, eta une honetan Europako ia 500 partner-ek osatzen dute.
Europako Bauhaus Berria mugimendu sortzaile eta transdiziplinarra da. Zientziaren eta teknologiaren eta artearen eta kulturaren arteko zubi gisa sortu da, gure erronkak aprobetxatzeko eta gure bizitzak hobetzeko, elkarrekin arazo sozial konplexuak jorratzeko, guztion arteko sorkuntzaren eta maila guztietako parte-hartzearen bidez, hiru balio bereizezin hauen inguruan:
-
Iraunkortasuna
-
Estetika
-
Inklusioa
Horregatk, Euskadin NEBko bazkide guztiok parte hartu genuen gaiari buruzko hitzaldi bat antolatu genuen, Europako Bauhaus Berria iniziatiba ezagutzeko eta Euskadin parte hartzen dugunon arteko elkarrizketa eta lankidetza sustatzeko. Hitzaldia, Euskadiko NEBko bazkideen elkarlanerako abiapuntua izan zen.
