10 Oct, 2024
Zenbait urtez larrialdi-baliabideak martxan jarri ondoren, eta nazioarteko mapan hainbat krisi humanitarioren ondorioz pertsonak eta familiak lekualdatzeko premiei erantzun ondoren, EDE Fundazioaren harrera- eta inklusio-baliabideak finkatu egin dira, eta horiei esker gizarte-premia garrantzitsuei erantzuten jarraitzen dugu. Harrera-baliabide horien kudeaketarekin, bizi-baldintza duinak bermatzeko eta hartzaileen integrazio- eta autonomia-prozesuan lagundu ahal izateko behar diren zerbitzuak emateko aukera dugu.
Une honetan, lau dira kudeatzen ditugun aldi baterako harrera-bizitokiak:
- Mañarikua egoitza (Derio). 50 pertsonentzako edukiera du, eta gaur egun 44 pertsona daude bertan, asiloa eskatzen dutenak.
- BBK Bilbao Good Hostel (Bilbo). Lantegi Batuakekin lankidetzan kudeatzen dugun baliabidea. Hirurogeita hamar pertsonentzako ostatua du, eta une honetan asiloa eskatzen duten hirurogei pertsona hartzen ditu.
- Atxuri egoitza (Bilbo). 25 plaza ditu eta 24 laguneko okupazioa du gaur egun.
- Olakueta Etxea (Berriz), non migratzaileak eta egoera sozial ahulean dauden pertsonak artatzen ditugun. Berrogei lagunentzako edukiera du, eta gaur egun 25 laguni ematen diegu aterpe.
Bizitoki sozialek eguneko 24 orduetan, urteko 365 egunetan, arreta eta presentzialtasuna eskaintzen dituzten baliabideak dira. Horietan lan egiten duen lantaldea zabala da, eta esku hartzeko taldea eta euskarri-taldea ditu. Gaur egun, hogeita hamar dira horiei lotutako pertsonak.
Urte hauetan lortutako esperientziatik abiatuta, gure laguntza-lana bideratzen duten oinarrizko printzipio batzuk definitu ditugu:
- Hona iristen diren pertsona guztien giza duintasuna aitortzea, errespetatzea eta balioestea.
- Migratzaileen eskubideak bermatzen eta eskuratzen laguntzea.
- Autonomia sustatzea.
- Zaintzatik, ostatu hartutako pertsonen behar espezifikoei erantzutea.
Printzipio horiek kontuan hartuta, hauek dira EDE Fundazioaren bizitoki sozialen helburuak:
- Informazioa ematea eta beste erakunde batzuekiko komunikazio-zubi izatea, ingurunearekiko eta komunitatearekiko lotura errazteko.
- Laguntza eta arreta psikosoziala ematea, pertsona eta/edo familia bakoitzaren behar espezifikoen arabera.
- Bizikidetza positiborako espazioak, baldintzak eta trebetasunak sortzea.
- Gizarte-ingurunearekiko eta komunitatearekiko lotura sustatzea.
- Nazioarteko babesa eskatzen duten pertsonek Euskadin eta Estatuan dituzten erronkak gainditzeko gaitasunak sustatzea.
Ostatu-hartzaileekiko jarduera nagusiak honako hauek dira: hasierako harrera (ostatua eta mantenua), premien arreta eta oinarrizko kudeaketak, eta arreta soziala (osasuna, aldi baterako babesa eskatzea, hizkuntza ikastea, eskolatzea…), eta ingurunearekiko lotura (boluntariotza, jarduerak, kultura, kirola eta astialdia), gizarteratzeko prozesuaren beste fase bati begira.
