Asteazken honetan Bakearen Nazioarteko Eguna da, eta Kataluniako Paz-ICIP Nazioarteko Institutuak erabaki du Euskal Herriko gizarte zibilaren hainbat ekimeni ematea “bakearen, indarkeria politikoaren amaieraren eta bizikidetza- eta adiskidetze-esparru berriak sortzearen bidean egindako ekarpenagatik”.
Aitorpen mota honek balioan jartzen ditu gaur egun gauden puntura iristeko ahalbidetu duten erakunde eta ekimen guztien urrats guztiak.
Urte hauetan zehar Bakeolak indarkeria, terrorismoa eta giza eskubideen urraketa guztiak salatu ditu, baina era berean, elkarrizketarako eta gatazken kudeaketa positiborako hainbat gune sortu ditugu, polarizazio sozialaren eta kontrako sentsibilitateen testuinguru batean; batzuk maila politikoan, beste batzuk herritarren mailan (talde txikiak, tokikoak, gazteak, publiko handi bati zuzendutakoak), eta horietako bakoitza garrantzitsua izan da.
Besteak beste, Bakeola-EDE Fundazioa eta Eskubidez Giza Eskubideen eta Bakearen aldeko Hezkuntzako Elkarteen Foroa saritu dituzte. Horregatik guztiagatik pozten gara, eta bide horretatik jarraitzera animatzen gaitu. Sari hau gurekin partekatzen dutenak ere zoriondu nahi ditugu: Gernika Gogoratuz, Euskal Herriko Bakearen Aldeko Koordinakundea, Elkarri/Lokarri, Baketik, Fernando Buesa Fundazioa, Gernikako Bakearen Museoa, Argituz, Ahotsak, EmaGune, UnescoEtxea, Bakea Orain, Denon Artean, Foro Sozial Iraunkorra eta Donostiako Herritarren Foroa.
Eta izendatzen ez badira ere, ezagutzen ditugu bakearen alde lagundu duten erakunde eta beste ekimen txiki, apal eta ez oso ezagun batzuk ere sari honen partaide egin nahi ditugunak.
Hemendik, proposatutako ekimenetan parte hartzera animatu diren pertsona eta erakunde horiei guztiei (eskolak, aisialdiko taldeak, giza eskubideen eta memoriaren batzordeak, herritarren foroak, etab.) ere egin nahi diegu sariaren partaide; eta bereziki aipatu nahi ditugu urte hauetan guztietan gurekin egon diren eta laguntzen utzi diguten biktimak, eskuzabaltasunagatik eta ekarpen desinteresatuagatik.