Ez dago atzera bueltarik. Duela hilabete batzuk azaleratzen ari zen amets mugagabea baino ez zena, ibilitako esperientziatik imajinatua, asmo onez eta erantzukizun sozialez hornitua, eta etorkizun baterantz proiektatua, ia errealitate bat da. Gaur egun, PLAZA proiektua eraikitzen ari da. Espazio plural eta irekia da, ekosistema sozial bat hartuko duena. Bertan, izaera desberdineko proiektuak egongo dira, gure inguruneko behar sozialei erantzuteko helburu komunarekin.
Oraindik eraikin huts bat da, berritzeko fasean dagoena, lehen bizi izan ziren pertsonen eta proiektuen ondarea arnasten duena, baina dagoeneko hazten ari dira haren baitan bazterketa-arriskuan dauden 64 pertsonari ostatu emateko gaitasuna duten 28 apartamentu sozialak, sukaldaritza sozialaren mundua birmoldatu nahi duen GURUZU jatetxea soziala, zaurgarriak diren pertsonen eta lan-merkatuan sartzeko zailtasunak dituzten ikasleen prestakuntzarako, orientaziorako eta laguntzarako guneak, Bilboko erdigunean kultura-agenda erakargarria eta irisgarria eskainiko duen erdiko patio handia, gure balioak partekatzen dituzten eta gure misioa indartzen duten beste gizarte-erakunde batzuekin partekatutako lan-espazioak, eta gure talde, langile profesional eta boluntarioentzako lan-eremu berria. Emozio eta ospakizun garaia da, eta horregatik sentitzen ditugu ilusioa, erantzukizuna, beldurra,… EDE Fundazioaren bilakaera luze honetan une paregabe garrantzitsu baten aurrean gaudela badakigulako; izan ere, EDEren 50. urteurrena betetzear dago, eta beti ere, gizarte-premiak dituzten hainbat kolektiboren zerbitzura.
PLAZA, gure haur berria, konpromiso, heldutasun eta egiten jakitearen emaitza da, gure inguruneko erreleboek, langile berriek eta eskakizun sozialek ematen duten energia guztiarekin hornitua. 2023. urte honen erdialdean haurdunaldia ondo zihoala baieztatu zenetik, lehen hilabete horiei dagozkien buruhauste logikoak hartu ditugu etengabe, baina berme osoz baiezta dezakegu osasuntsu, eder, indartsu… jaioko dela, eta gogo handia dakarrela azaleratzeko eta inguruko munduarekin konektatzen hasteko. Pasatzen den egun bakoitzean “ostikadatxoak” sentitzen ditugu, gure baitan hazten jarraitzen du… eta dagoeneko gogoa dugu aurpegia ikusteko eta zuetako bakoitzari harrotasunez beteta aurkezteko.
Lehenengo amesten diren eta batzuetan egia bihurtzen diren kirol-helburu handiak bezala, dagoeneko gutxiago geratzen da espazio berri hau partekatzeko, ospatzeko eta elkarrekin gozatzeko.
