EDEren harrerarako baliabideak

• Olakueta Etxea (Berriz) 2018ko irailean sortu zen, urte hartan izandako Saharaz hegoaldeko migratzaileen etorrerari erantzuna emateko. Zaurgarritasun-egoeran dauden 34 pertsona eta familiari ematen die arreta.
• Mañarikua Egoitza (Derio) berriz ireki genuen 2021eko abenduan, ZEHARek eskatuta, Inklusio, Gizarte Segurantza eta Migrazio Ministerioaren lehen harrera-sistemarako. 37 asilo-eskatzaileri ematen die arreta.

Errusiaren inbasioaren ondorioz Ukrainatik etorritako pertsona eta familiei erantzuna emateko, honako baliabide hauek jarri ditugu martxan:

• BBK Bilbao Good Hostel (Bolueta), 77 pertsonarekin, Lantegi Batuakekin elkarlanean.
• Bilbao Hostel (Kastrexana), 18 pertsonarekin.
• Atxuri egoitza (Bilbo), 13 pertsonarekin.
• Fadura egoitza (Getxo), 53 pertsonarekin.

Sei baliabideen artean, guztira, 280 pertsonari arreta emateko gaitasuna dugu.

Harrera-baliabide hauek martxan jartzeko ahalegin handia egin dugu barneko eta kanpoko elkarlaneko harremanak aktibatzeko, eta 30 pertsona inguruko lantaldea osatu dugu arreta zuzena emateko (bi heren, kontratu berriak).

BILTZENek egindako ekarpenak ere nabarmentzekoak dira, Eusko Jaurlaritzaren ondoz ondoko Kontingentzia Planen esparruan: laguntza- eta informazio-dokumentuak, itzultzaileen poltsa bat sortzea, polizia-etxeetan laguntza emateko interpreteak aktibatzea, etab.

Honako hauek dira errefuxiatuekin egiten ditugun jarduketa nagusiak: hasierako harrera (ostatu ematea eta mantenua), oinarrizko beharrei eta kudeaketei arreta ematea (osasuna, aldi baterako babesa eskatzea, hizkuntza ikastea, eskolaratzea…), beharrezko arreta psikosoziala (laguntza psikologikoa, gerraren inpaktua lantzea, doluak, estres traumatikoa eta post-traumatikoa) eta ingurunearekiko lotura (boluntariotza, jarduerak, kultura, kirola eta aisialdia), bigarren gizarteratze-fase batera edo gizartean txertatzera bideratuta.